(50) اور ہمارا حکم تو آنکھ کے جھپکنے کی طرح ایک بات ہوتی ہے
(51) اور ہم تمہارے ہم مذہبوں کو ہلاک کرچکے ہیں تو کوئی ہے کہ سوچے سمجھے؟
(52) اور جو کچھ انہوں نے کیا، (ان کے) اعمال ناموں میں (مندرج) ہے
(53) (یعنی) ہر چھوٹا اور بڑا کام لکھ دیا گیا ہے
(54) جو پرہیزگار ہیں وہ باغوں اور نہروں میں ہوں گے
(55) (یعنی) پاک مقام میں ہر طرح کی قدرت رکھنے والے بادشاہ کی بارگاہ میں
الرحمن Ar-Rahmaan
(1) (خدا جو) نہایت مہربان
(2) اسی نے قرآن کی تعلیم فرمائی
(3) اسی نے انسان کو پیدا کیا
(4) اسی نے اس کو بولنا سکھایا
(5) سورج اور چاند ایک حساب مقرر سے چل رہے ہیں
(6) اور بوٹیاں اور درخت سجدہ کر رہے ہیں
(7) اور اسی نے آسمان کو بلند کیا اور ترازو قائم کی
(8) کہ ترازو (سے تولنے) میں حد سے تجاوز نہ کرو
(9) اور انصاف کے ساتھ ٹھیک تولو۔ اور تول کم مت کرو
(10) اور اسی نے خلقت کے لئے زمین بچھائی
(11) اس میں میوے اور کھجور کے درخت ہیں جن کے خوشوں پر غلاف ہوتے ہیں
(12) اور اناج جس کے ساتھ بھس ہوتا ہے اور خوشبودار پھول
(13) تو (اے گروہ جن وانس) تم اپنے پروردگار کی کون کون سی نعمت کو جھٹلاؤ گے؟
(14) اسی نے انسان کو ٹھیکرے کی طرح کھنکھناتی مٹی سے بنایا
(15) اور جنات کو آگ کے شعلے سے پیدا کیا
(16) تو تم اپنے پروردگار کی کون کون سی نعمت کو جھٹلاؤ گے؟